व्हॅलेंटाईन डेला बाजारात गुलाबाची कमतरता भासणार: वातावरणातील बदलाचा गुलाब शेती मोठा फटका



पिंपरी (टाईम न्युजलाईन नेटवर्क):
वातावरणातील बदलाचा मोठा फटका गुलाब शेती करणाऱ्या शेतकऱ्यांना बसला. गेल्या वर्षीच्या तुलनेत यंदा वीस टक्के उत्पादन घटलं. त्यामुळं व्हॅलेंटाईन डे दरम्यान बाजारात गुलाबाची कमतरता भासणार आहे. याचा फायदा व्यापारी घेणार असून प्रेमीयुगलांना प्रेमाचं प्रतीक असणाऱ्या का गुलाबासाठी तीस ते पन्नास रुपये मोजावे लागणार आहे. 
वरुणराजा यंदा ऑक्टोबरपर्यंत बरसला. ही बाब गुलाब शेतकऱ्यांसाठी लाभदायक असते, त्यामुळं गेल्या वर्षीच्या तुलनेत यंदा अधिक निर्यातयुक्त गुलाब बहरेल अशी शेतकऱ्यांना अपेक्षा होती. पण डिसेंबरमध्ये अवेळी पडलेला पाऊस आणि जानेवारीत अतिउष्ण वातावरणामुळे शेतकऱ्यांचा भ्रमनिरास झाला. 
पुण्याच्या मावळ तालुक्यातील जयसिंग हुलावळे हे गुलाब शेती करतात. प्रेमाचं प्रतीक असणाऱ्या गुलाबाने त्यांना गेली दोन वर्ष गुलाबी नोटा मिळवून दिल्या. यंदा ऑक्टोबर महिन्यापर्यंत झालेला पाऊस त्यांना भरारी देईल, या आशेने त्यांनी मशागतीला चांगला जोर लावला. पण उलट वातावरण अतिउष्ण झाल्याने त्यांना पंचवीस टक्क्यांचा फटका बसलाय. चार एकरच्या पॉली हाऊसमधून २०१८च्या व्हॅलेन्टाईन दरम्यान २२ लाख तर २०१९च्या व्हॅलेन्टाईन दरम्यान २५ लाख रुपयांचा त्यांना नफा झाला होता. यंदा मात्र सात ते आठ लाखांचं नुकसान त्यांना झेलावं लागलं. 
तळेगाव एमआयडीसी परिसरातील बीएससी ऍग्रीचे शिक्षण घेतलेले दिलीप दळवी ही यंदा चिंतेत आहेत. बागायत शेतीपेक्षा गुलाब शेतीत पैसा अधिक खेळतो म्हणून त्यांनी पॉली हाऊस उभारलं. अडीच एकर शेतीतून २०१८ सालच्या व्हॅलेंटाईनला दहा लाख आणि २०१९च्या ही व्हॅलेंटाईनला दहा लाख रुपये खिशात पडले. पण यंदा बदललेल्या वातावरणामुळं मात्र पाच लाख रुपये मिळण्याची ही शाश्वती नाही.  
व्हॅलेंटाईन साठी भारतातून देशभर निर्यात होणाऱ्या गुलाब मध्ये मावळाचा पन्नास टक्क्यांचा वाटा असतो. त्यामुळं जयसिंग हुलावळे आणि दिलीप दळवींप्रमाणे सव्वा दोनशे हेक्टरवर गुलाब शेती करणारे शेतकरी चिंतेत आहे. यंदा सरासरी वीस टक्के तोटा सर्वांना सहन करावा लागणार आहे. अशी माहिती इंडियन सोसायटी ऑफ फ्लोरिकल्चर प्रोफेशनल्स (आयएसएफपी)चे अध्यक्ष प्रवीण शर्मा यांनी दिली. 2018 आणि 2019 साली 56 ते 57 कोटी रुपयांची उलाढाल गुलाब शेतीतून झाली होती. यंदा सरासरी 20 टक्के उत्पादन घटल्याने 50 कोटींच्या आतच उलाढाल होणार आहे.
वातावरणातील बदलाचा हा फटका शेतकऱ्यांना बसणार असताना, व्यापाऱ्यांच मात्र फावणार आहे. कारण उत्पादन घटल्याने यंदा बाजारात गुलाबाची कमतरता भासेल. परिणामी व्यापारी प्रेमी युगलांना लुटण्याची तयारी करतायेत. हे पाहता यंदा प्रेमी युगलांना एका गुलाबासाठी तीस ते पन्नास रुपये मोजावे लागणार आहे. 
50 दिवसांच्या मशागतीनंतर 10 हजार फुलांमागे शेतकऱ्यांना 50 हजार रुपये फायदा होईल. तिथंच ही 10 हजार फुलं व्यापाऱ्याला दोन-तीन दिवसातच बसल्या जागी एक लाख रुपये मिळवून देणार आहे. यंदा उत्पादन घटलं असलं तरी ही पुण्यातून 35 लाख फुलं उत्पादनाचं टार्गेट आहे, तेंव्हा शेतकऱ्यांपेक्षा व्यापारी यंदा कसे मालामाल होतील याचा विचार न केलेलाच बरा.
Labels:

Post a Comment

[blogger]

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget